- Tíðindi, mentan og ítróttur
Bussleiðin bara ókeypis hjá borgarum
Nú skal bussleiðin í Tórshavnar kommunu ikki longur vera ókeypis hjá øllum - bara hjá borgarum í kommununi.
Ferðafólkatalið veksur, og tað merkist eisini í býarbussunum í Tórshavnar Kommunu. Tað sigur Bogi Andreasen, formaður í Vinnunevndini í Tórshavnar Kommunu.
- Tað er ein trupulleiki, serliga um summarið, at bussarnir er fullir av ferðafólki og borgarin, sum annars rindar fyri bussleiðina, ikki sleppur við, sigur Bogi Andreasen.
Ein liður í ferðavinnupolitikkinum hjá Tórshavnar kommunu, sum varð viðtikin fyri jól í fjør, er at fáa eitt borgarakort til allar borgarar í kommununi.
Borgarakortið skal geva atgongd til ókeypis bussleið. Hini, sum ikki hava kortið, skulu gjalda fyri túrin.
- Vit eru í gongd við at kanna, hvussu tað kann rigga. Tað er soleiðis, at hvør einstakur borgari í Tórshavnar kommunu fær eitt kort ella okkurt á sína smartphone, sigur formaðurin í Vinnunevndini í Tórshavnar kommunu.
- Tey, sum ikki hava tað, gjalda so í bussunum. Hevur tú kort, sleppur tú ókeypis, sigur hann.
Eisini er ætlanin við borgarakortinum, at vinnan skal fáa størri ágóða av borgarakortinum.
- Tað gongur eisini út yvir aðrar vinnur, at vit hava ókeypis bussleiðis - eitt nú taxavinnuna. Heldur enn at gjalda fyri ein taxabil, so fara ferðafólkini í bussin, sigur Bogi Andreasen, sum væntar, at borgarakortið kann vera við til, at ferðafólkini leggja fleiri pengar eftir sær, tá tey vitja í Havnini.
Væntandi verður borgarakortið ella líknandi skipan sett í verk til komandi ár.
Tak niður