KÍ møtir sterkari mótstøðu í Evropa League

Klokkan 17.00 í dag spælir KÍ Evropa League dyst móti Zalgiris Vilnius úr Litava.

KÍ hevur vunnið seg víðari til hetta umfarið, Zalgiris var seedað, og tí er hetta teirra fyrsti dystur í hesi kappingini í hesum umfarinum.

Mótstøðuliðið hjá KÍ er sigursvant felag. Teir hava vunnið litavisku landskappingina sjey ferðir.

Frá 2013 til 2016 vunnu teir kappingina í fýra ár á rað. Har afturat hevur felagið vunnið steypakappingina ellivu ferðir.

Felagið hevur tískil stolta søgu, sum gongur langt aftur. Zalgiris kappaðist í sovjettisku kappingini frá 1947 fram til 1989. Besta úrslitið í hesi sera sterku kappingini var í 1987, tá Zalgiris endaði á triðja plássi í ovastu deildini.

Í fjør var Zalgiris í undanumfarinum í Champions league kappingini, har teir møttu bulgarska meistaranum, Ludogorets. Zalgiris vann heimadystin 2-1, men tapti 4-1 á útivølli.

Verjuspælarin hjá KÍ, Hørður Askham sigur, at hann og liðfelagarnir hava sæð sjónbond við dystum hjá Zalgiris, og út frá teimum væntar hann sær harða mótstøðu.