Gera enn eina roynd at fáa orð á arbeiðsgevarar

Danska felagið FPU ætlar at gera enn eina roynd at tosa við Føroya arbeiðsgevarafelag um flogternurnar hjá Atlantic Airways.

Arbeiðsgevarafelagið vil ikki samráðast við útlendsk fakfeløg. 

Málsøkið arbeiðsmarknaður er føroyskt burturav, sigur felagið.

Farnar upp í FPU
Flogternurnar hjá Atlantic Airways eru farnar úr Starsvmannafelagnum og upp í danska felagið FPU, Flyvebranchens Personale Union.

FPU hevur biðið Føroya arbeiðsgevarafelag um samráðingar um nýggjan sáttmála. Men Arbeiðsgevarafelagið ger ikki sáttmálar við útlendsk fakfeløg.

Starvsmannafelagið longdi í heyst sáttmálan hjá flogternunum við Arbeiðsgevarafelagið í eitt ár.

Í setanarskrivinum hjá flogternunum stendur, at tær eru løntar sambært sáttmála við Starsvsmannafelagið.

Og hann er galdandi fyri flogternurnar sum einstaklingar, eru tær ikki limir í Starvsmannafelagnum.

Tær eru allar farnar úr Starvsmannafelagnum.

Atlantic Airways er limur í Føroya arbeiðsgevarafelag.

Eisini flogskiparar

Tað ræður um at vera í einum felag, sum veit nakað um flogvinnuna. 

Tað ger einki fakfelag í Føroyum, men tað ger danska felagið FPU.

Tað sigur Flogskiparafelag Føroya, sum eisini er í FPU, Flyvebranchens Personale Union.

Tað er heilt natúrligt, at vit vilja vera limir í einum fakfelag, sum umboðar starvsfólk á flogførum. 

Stórur partur av flogmonnunum i Norðurlondum eru limir í FPU, sigur Flogskiparafelagið í kunning.

Tað verður Flogskiparafelag Føroya, sum fer at samráðast um sáttmála, tí felagið kennir best umstøðurnar hjá flogmonnum í Føroyum.

Ráð og serkunnleiki

FPU fer at ráðgeva og stuðla við sínum serkunnleika og halda skeið. 

Hetta hevur Flogskiparafelagið ikki orku til einsamalt.

Flogskiparafelagið vil eisini vera limur í IFALPA, sum er altjóða fakfelag fyri flogskiparar.

Skal tað bera til, er limaskapur í FPU einasti møguleiki, sigur Flogskiparafelagið.

Flogskiparafelagið og Arbeiðsgevarafelagið gjørdu í vár nýggjan sáttmála, sum er galdandi til 31.mars næsta ár.