- Tíðindi, mentan og ítróttur
Yvirlækni: Heilsumálaráðið skilir ei heilsuverkið
Stýring niður í smálutir og manglandi álit á sjúkrahúsleiðsluna ger uppgávuna at standa á odda fyri sjúkrahúsverkinum vónleysa.
Tað sigur Tummas í Garði, yvirlækni og fyrrverandi læknastjóri, sum finst hvassliga at Heilsumálaráðnum, nú sjúkrahússtjórin Jóanis Erik Køtlum tveitti handklæðið í ringin eftir bara 14 mánaðum í stjórastarvinum.
Eftir fund við Heilsumálaráðið fríggjadagin, har staðfesta meirnýtslan á 11 milliónir krónur í fjør var umrødd, valdi Jóanis Erik Køtlum at siga seg úr starvi sama fríggjakvøld.
Hóast sjúkrahússtjórin valdi at fara sjálvur - hann varð ikki uppsagdur - so heldur Tummas í Garði, at íkomna støðan er talandi dømi um manglandi forstáilsi í Heilsumálaráðnum fyri tí sjúkrahúsverki, sum aðalráðið varar av.
-Tað finst lítil og eingin heilsufakligur kunnleiki í Heilsumálaráðnum. Tí er heldur einki forstáilsi fyri heilsuverkinum. Og tí fer alt at snúgva seg um rokniark og fíggjarætlanir, sigur Tummas í Garði.
Hann hevur hug at brúka myndina av einum nevndarformanni í risa fyritøku, sum situr við rokniarkinum og stýrir niður í smálutir:
-Neyðugt er at vísa leiðsluni álit til at fremja tað í verki, hon er sett til og hevur fakligar førleikar til, sigur yvirlæknin og fyrrverandi læknastjórin.
Tummas í Garði hevur starvast á Landssjúkrahúsinum í 19 ár. Hesi árini hevur hann havt ikki færri enn níggju stjórar.
-Tað gongur út yvir strategiska arbeiðið, ið stagnerar, sigur Tummas í Garði.
Hoyr innslag við at trýsta á pílin undir myndini
Tak niður
Sí eisini