Í ár er fyrstu ferð, at eitt klassiskt tónaskald varð kosið ársins nýggja navn á FMA, og tann heiðurin fekk Eli Tausen á Lava.

Eli Tausen á Lava er 22 ár og lesur kompositión á musikkonservatoriunum í Malmø, har hann byrjaði síðsta summar.

Tónleikur hevur fylt nógv í lívinum hjá Eli, og byrjaði hann at spæla viola sum 8 ára gamal. Hetta gavst hann tó við nøkur ár seinni. Sum tannáringur lærdi hann seg at spæla klaver, og tá lurtaði hann nógv eftir symfoniskum heavy metal tónleiki. Millum annað hetta birti ein áhuga fyri klassiskum tónleiki, og fór hann undir at skriva klassiskar kompositiónir.

Í 2015 fór hann á Musikskúla Miðnám, har hann hevði Sunleif Rasmussen sum lærara í kompositión.

Eli Tausen á Lava er sannførdur um, at yrkisleið hansara er at skriva tónleik. Hann heldur, at samstundis sum ástøðið skal verða í lagi, so er tað týdningarmikið at hava eina lætta, spælandi og stuttliga tilgongd til tað at skriva klassiskan tónleik. Hann sær eisini seg sjálvan sum ein opnan persón við einum lættum lyndi. Hetta heldur ahnn eisini hoyrist í hansara kompositiónum - tað lætta, spælandi og skemtiliga. Eli fær millum annað íblástur úr tónleiki í telduspølum, júst tí, at tónleikurin er lættur og skemtiligur, men samstundis forteljandi, livandi og spennandi.

Lurtið eftir samrøðuni við Eli, har brot verða spæld úr trimum av hansara kompositiónum.