- Tað er púra ógreitt, hvat bretar vilja

Halla Poulsen, forkvinna í Brexitbólkinum hjá Landsstýrinum, sigur, at tað framvegis er púra ógreitt, hvat bretar fara at gera í Brexit høpi.

Fyrst atkvøddi bretska tingið atkvøða um avtaluna hjá Theresu May, um hvussu Bretland skal fara úr ES. Uppskotið fall.

Eftir hetta skuldi tingið siga sína hugsan um, hvørt Bretland skuldi fara úr ES uttan nakra avtalu. Tað uppskotið fall eisini.

Síðani var atkvøtt um, hvørt Theresa May kundi fara undir samráðingar at leingja avtaluna við ES. Tað uppskotið bleiv samtykt.

Valið til Evropaparlamentið verður í mai og fer at virka í juli. Tí er umráðandi at avtala er fingin í lag í seinasta lagi 30. juni.

Hetta fer helst ikki at hava nakra ávirkan á okkum í Føroyum, tí vit hava fingið eina avtalu í lag við bretar, sum fær virknað, tá teir fara úr ES, sigur Halla Pousen, forkvinna í Brexitbólkinum.