- Tíðindi, mentan og ítróttur
Góðan morgun Føroyar
Tá Føroya Fuglafrøðifelag hevði aðalfund 27. apríl, vóru fimm fuglfrøðingar heiðraðir. Teir vóru Bergur Olsen, Aksal Poulsen, Erik Mortensen, Jens-Kjeld Jensen og Andrias Reinert.
Í grundgevingini, fyri at lata Andriasi Reinert heiðurslønina, stendur soleiðis: Andrias Reinert er at kalla undangongumaður Bergur Olsen, og setti hann sjøtul á at kanna og ringmerkja føroyskan lomviga.
Hetta førdi beinleiðis til, at fuglakanningarstøðin varð løgd aftrat Havrannsóknarstovuni og enn virkar í dag.
Andrias hevur tí havt avgerðandi týdning fyri alla sjófuglagransking í Føroyum.
Í Havn er hann eisini kendur fyri sínar royndir við føroysku gásini og øðrum húsdjórum, og hann gjørdi eisini forvitnisliga roynd at sleppa rýpum út sum veiðufugl í Føroyum.
Annars er hann kendur fyri sítt megnararbeiði innan menning av føroyskum havbúnaði og landbúnaði, og hevur hann sum heild lagt nógva vitan eftir seg um føroysku vistskipanirnar.