- Tíðindi, mentan og ítróttur
Góðan morgun Føroyar
Vit ynskja øll at hava kensluna av at hava hug at koma aftur, tá ið vit eru byrjað í einum nýggjum felagsskapi.
Tíverri er tað ikki altíð so, men í nýggja faldaranum, sum FUR og ÍSF hava gjørt í samstarvi við ABC fyri sálarliga heilsu, fáast einfaldar loysnir og uppskot um, hvussu ein tryggjar ta góðu móttøkuna í sínum felagi ella felagsskapi.
Faldarin vendir sær til limir, íðkarar og leiðarar í felagsskapum og til nevndarlimir, foreldur, venjarar, undirvísarar og hjálparfólk, t.e. øll tey, sum møta nýggjum limum ella luttakarum í felagsskapinum.
- Tað er av stórum týdningi, at venjarar og leiðarar í felagsskapum taka væl í móti nevndarlimum, sigur Jarvin Feilberg Hansen, ÍSF ráðgevi.
Faldarin kann skapa enn betri grundarlag fyri, at feløgini draga til sín og fasthalda nýggjar limir, leiðarar og aðra sjálvbodna hjálp, sum feløgini hava tørv á fyri, at kunna trívast og mennast.
Í faldaranum eru ítøkilig amboð og spurningar, sum felagsskapirnir kunnu arbeiða við.
- Hetta eru heilt lítil ting, sum kunnu gera munin, til dømis, at ein venjari/leiðari fer til ein nýggjan lim og heilsar uppá og býður vælkomin, sigur Rói B. Poulsen frá Føroya ungdómsráði.