- Tíðindi, mentan og ítróttur
Við Tórði á túri
Morskranes er niðursetubygd frá 1876 ella 77. Um tað mundið fluttu fimm húski til bygdina, tey flestu av Strondum. Menning Jacobsen greiðir fyrstu búsetingini á Morskranesi og frá ymiskum viðurskiftum í heimbygdini.
Kona Menning, Sonja Jacobsen, er ættað úr Vági, men búði í fleiri ár á Barnaheiminum í Havn. Hon sigur, at Menning hevði hug at tey skuldu búseta seg í Havn, men hon vildi heldur til Morskranesar og her hevur hon trivist væl. Nú eru nýrini gingin fyri og tí fer hon tvær ferðir um vikuna til Havnar at fáa dialysu. Menning hevur boðið sær til at lata henni annað nýra og nú skulu tey bæði kannast fyri at vita um tað ber til.
Ungu hjúnini Hildigarð Djurhuus Hansen og Jørleif Djurhuus keyptu barnaheimið hjá Jørleifi, hóast hann ongantíð ætlaði sær at verða búgvandi í heimbygdini. Tað var Hildigarð, sum sá stóru møguleikarnar á Morskranesi, tí hon hevur Djóraansing og bygdin er sera væl egnað til tað, sigur hon. Jørleif arbeiðir sum bakari á Skála og tá hann hevur frí, hjálpir hann konuni við djóraansingini. Flest fólk aðra staðni vita ikki hvar Morskranes er, sigur Jørleif. Tá Eysturoyartunnilin verður tikin í brúk er Morkranes mitt í miðstaðarøkinum, men Jørleif væntar ikki at bygdin fer at vaksa kortini..
Sverri Kass greiðir frá einum serligum øki í Heygshaga omanfyri og sunnanfyri Morskranes. Lendið uttan um Skráhellu er ógviliga sermerkt. Her er nógv knúst grót, sum er slætt. Martin Heinesen jarðfrøðingur hevur nevnt, at hetta kann vera ein útúrgerð frá Eysturoyarsyllini. Niðasti partur av røðini eitur Heinaberg og tað hevur Jóan Hendrik Winther Poulsen skrivað um. Hann sigur at orðið hein, sum finst í norðurlendskum málum, merkir brýni.
Lissy og Gerhard Zachariassen búgva á Selatraðarvegi 485 á Morskranesi. Lissy er higani og Gerhard er úr Hattarvík í Fugloy. Tá tey bæði komu saman fyri mongum árum síðani, sigldi Gerhard við ísfiskaskipi, og tí kom tað slettis ikki uppá tal at búseta seg í Fugloy. Tey bygdu sær hús á Morskranesi.
Hesi fólk eru við í sendingini av Morskranesi:
Menning Jacobsen, Sonja Jacobsen, Hildigarð Djurhuus Hansen, Jørleif Djurhuus, Sverri Kass, Lissy Zachariassen, Gerhard Zachariassen