Odense er triðstørsti býur í Danmark. Kortini er hann bygdasligur og tí trívast føroyingar væl her. Navnið er úr víkingatíðini og serliga er tað ein søguligur høvundur, sum setir dám á býin og hevur gjørt hann heimskendan. Nevniliga H.C. Andersen.

Sólvá Malan Olsen er fødd og uppvaksin í Odense. Men bæði foreldrini eru føroysk, úr Leirvík og úr Rituvík. Tí tosar hon flótandi føroyskt. Hon er seera hugtikin av teimum gomlu føroysku træskipunum, ið vitja í Odense, meðan sendingin verður gjørd í juni mánaði. Skipini eru fimm í tali, umframt tveir gamlir deksbátar.

Sondy Simonsen er úr Klaksvík og tey búðu á Eiði, áðrenn familjan flutti til Odense. Hon hevur júst givið eina bók út, sum lýsir hvussu hon hevur havt tað sálarliga, eftir at hava verið misnýtt sum barn. Nú er hon frísk og gevur øðrum góð ráð í bókini.

Saman við øðrum rokast hjúnini Rudi og Hans Atli Dahl við at gera matin kláran, sum Føroyingafelagið og Bátafelagið Frigg skulu selja á stevnuni í morgin. Tey eru fegin um, at føroyingarnir í Odense standa so væl saman um hesi feløg. Rudi ger mat til tey gomlu í Kerteminde Kommunu og Hans Atli hevur saman við øðrum eina altjóða fyritøku, sum ger ílegukanningar, m.a. fyri danska sáðbankan.

Ása Mielsen úr Vági flutti til Odensen at búgva, tí hon hevur tvær døtur og ommubørn í býnumn, og harafturat arbeiðir hon í Noregi, og tá er tað lættari at ferðast ímillum. Hon er kortini ofta í Vági. Nógvu blómurnar og blómandi trøðini sermerkja býin, sigur hon, og fólkið í Odense og á Fjóni sum heild eru sera blíð.

87 ára gamla Jonhild Holm úr Klaksvík hevur búð í Odense síðani 1959. Hon sigur, at hon hevur tað gott og hevur einki at klaga um. Men hon eigur ongi børn og hevur onga familju í Odense. Maðurin, sum var av Bornholm, doyði 2007. Tað er bara ein vinkona eftir á lívi og hon býr í Ringe.

Rani Ingebrigtsen Leo úr Vestmanna og Vagnur Ákason á Miðgerði úr Hvalba er nýliga komnir til Odense. Rani lærir til rørleggjara og Vagnur lesir til sosialráðgeva. Teir siga báðir, at Odense hevur alt sum ein lestrarbýur eigur at hava.

Kaj Joensen, sum arbeiðir við tíðindatænastu á Christiansborg í Keypmannahavn, býr í Odense og ferðast ímillum. Hann sigur, at býurin hevur klárað at selja seg uppá H.C. Andersen, sum m.a. er sera væl umtóktur í Kina. Odense hevur eingi háhús og tað ger at hanb er hugnaligur og væl egnaður fyri føoyrigar.

Gunn Djurhuus úr Norðragøtu hevur búð í Odense í 18 ár. Hon kom til býin í at lesa og síðani hevur hon fingið danskan mann og familju. Hon er leiðari á einum barnaheimi fyri børn tøn, sum ikki kunnu búgva heima hjá foreldrunum.