- Tíðindi, mentan og ítróttur
Góðan morgun Føroyar
Skúlastýrið í Hoyvíkar skúla hevur mælt til at hava tvær telefonfríar vikur í skúlaárinum. Hesum tekur Hoyvíkar skúli undir við.
Fyrra telefonfría vikan er júst nú, frá 2. til 6. desember, og seinna vikan verður frá 30. mars til 3. apríl 2020.
Skúlastjórin í Hoyvíkar Skúla, Hans Jón Thomsen sigur, at verður nógv tosað um skíggjanýtslu í dag, og í Hoyvíkar skúla hugsa tey eisini um, hvussu telefonnýtsla kann skipast og tálmast, og tí royna tey hetta tvær vikur um árið.
Hoyvíkar Skúli hevur ein telefonpolitikk, sum loyvir næmingum í 4.-9. flokki at nýta telefonina í fríkorterinum, men næmingar í 1. - 3. flokki ikki sleppa at brúka telefonina í skúlatíð.
Hans Jón Thomsen sigur, at tey tíma ikki at banna telefonnýtslu, men vilja vegleiða og upplýsa um nýtsluna og fyribyrgja ovurnýtslu.
Emma Sannino og Torstein Sivertsen, næmingar í 9. flokki, halda telefonfríu vikuna vera góða. Tey bæði siga, at tað er gott at varpa ljós á telefonnýtslu, men næmingar í framhaldsdeildini brúka ikki so nógv telefonina í fríkorterinum vanliga.