- Tíðindi, mentan og ítróttur
Breddin
Eftir null-rentu í drúgva tíð eru peningastovnarnir farnir at handla við negativum rentum. Føroysku peningastovnarnir fara sama veg - og 1. mars skulu eisini privatfólk við hálvari millión á bók gjalda fyri at hava pengarnar í bankanum. Og hvørja ávirkan kann tað so fáa á eitt samfelag? Luttakarar eru Lars Krull, bankaserfrøðingur; Árni Ellefsen, forstjóri í BankNordik og Kára á Dunga, stjóri í Betri Heim.
Semingsmaðurin hevur tikið yvir strandaðu samráðingarnar millum Starvsmannafelagið og Lønardeildina í Fíggjarmálaráðnum. Men hvat merkir tað, tá tosað verður um reallønarvøkstur? Tað spyrja vit Djóna Højgaard, formann í Búskaparráðnum. Samstundis sum fakfeløgini stríðast fyri hægri lønum fyri fjøldina, so gerast nøkur fá fólk nógv ríkari. Tað vísir ein greining hjá Jón Joensen, hagfrøðingi.
Breið, politisk semja er um at gera tunnil til Suðuroynna. Tað bar til at staðfesta í løgtinginum seinnapartin. Men enn eru flokkarnir ymiskir á máli um, hvussu henda risa verkætlan skal fíggjast. Vit tosa við Bjarna Hammer, løgtingsmann fyri Javnaðarflokkin, og Jørgen Niclasen, landsstýrismann í fíggjar- og tunnilsmálum.
Sendingina gjørdu: Marjun Dalsgaard, Anna Poulsen, Sólvit Nolsø
Redaktørur: Jón Brian Hvidtfeldt