Verða nú kvinnur á pappírinum

Stýrisskipanin skal broytast, so at løgtings- og landsstýriskvinnur eisini á pappírinum eita kvinnur og ikki løgtings- og landsstýrismenn, sum tær eita í dag.

Tað segði Bárður Nielsen, løgmaður, á landsfundi hjá Sambandsflokkinum í dag.

Tað var fyrr í ár, at tingkvinnurnar, Ingilín D. Strøm úr Javnaðarflokkinum og Hervør Pálsdóttir úr Tjóðveldi, løgdu uppskot fram um at broyta starvsheitini hjá løgtings- og landsstýrisfólkum, soleiðis at løgtingskvinnur og landsstýriskvinnur eisini á pappírinum eita kvinnur og ikki løgtings- og landsstýrismenn.

Á landsfundi hjá Sambandsflokkinum fyrraparin segði Bárður Nielsen, løgmaður, at hetta nú verður broytt.

Hervør Pálsdóttir, tingkvinna fyri Tjóðveldi, fegnast um ætlanirnar at broyta starvsheitini, men er tó bangin fyri, at politiskar ósemjur um aðrar broytingar í stýrisskipanarlógini, kunnu hava við sær, at starvsheitini ikki verða broytt.