Dexter Gordon var tveir metrar høgur

Havnar Jazzfelag fyllir í hesum døgum 45 ár. Felagið varð stovnað í 1975, og longu tvey ár seinni í 1977 kundi felagið presentera eina heimsstjørnu á palli í auluni í Kommunuskúlanum í Havn, nevniliga hin navnframa Dexter Gordon. Vikuskiftissendingin var á gátt hjá Kristiani Blak, sum var við til at stovna Havnar Jazzfelag. Kristian greiðir frá, um tá ið Dexter Gordon kom til Føroya við bólki. Kenny Drew klaver, Jesper Lundgaard bass, Aage Tanggaard trummur og Dexter Gordon saxofon. Teir komu á gátt hjá Kristiani á Reyni. Heima hjá honum var vítt til veggja, men synd er at siga, at høgt var til loftið í gomlu føroysku húsunum. Tað kundi tveir metra høga saxofonstjørnan sanna, tá hann smekkaði høvdið upp undir loftið fleiri ferðir. Hoyr samrøðuna við Kristian Blak. Sum nakað forkunnugt kann Vikuskiftissendingin spæla upptøkur frá konsertini. Hesar hava vit fingið frá Kristiani Blak, sum hevur fingið tær frá Brandi Øssursson. Upptøkurnar gjørdi Carsten Arnskov í 1977 fyri Útvarp Føroya. Sending varð gjørd um konsertina. Vit hoyra eisini ein ungan Sonne Smith annonsera og hugleiða um jazz sum heild. Rætting: Sagt verður í samrøðuni, at konsertin var 23. mei 1977. Tað er ikki rætt, hon var 25. mars, sum Sonne Smith eisini vísir á í innganginum.