- Tíðindi, mentan og ítróttur
Føroyskur skipari: Ov nógvur vindur at fara inn
– Tað var ov nógvur vindur at fara inn í Suez-veitina, tá bingjuskipið, Ever Given, sum hevur tipt veitina síðani týsdagin, fór inn, heldur Helgi Strøm, sum er skipari á bingjuskipinum Marchen hjá Mærsk.
Tveir nýggir sleiparar eru á veg til Suez-veitina at hjálpa til at fáa stóra bingjuskipið, Ever Given, leyst frá landi, eftir at tað týsdagin sigldi á land í Suezveitini.
Í minsta lagi 10 sleipibátar og fleiri sandbátar royndu ígjár at fáa skipið leyst úr rununi.
Grafikkur: Her tippir bingjuskipið, Ever Given, Suez-veitina
Kelda: Maritime Casualty Specialists
Ever Given er eitt av heimins størstu bingjuskipum. Tað er 400 metrar langt og vigar 220.000 tons.
150 ára gamla Suez-veitin, sum er í Egyptalandi, er 190 kilometrar long, 24 metrar djúp og umleið 205 metrar breið.
Veitin knýtur Miðjarahavið og Reyðahavið saman, og er skjótasta farleið sjóvegis millum Evropa og Asia.
Fleiri hundrað skip liggja og bíða uttanfyri veitina eftir at sleppa í gjøgnum, - onnur skip hava av broytt kós og eru farin longu leiðina suður um Afrika.
19.000 skip sigla gjøgnum Suezveitina um árið, - tað svarar til 10 prosent av allari skipaferðslu.
Bingjuskipið, Marchen Maersk, er eitt av teimum skipunum, sum nú tekur longu leiðina suður um Góðvónarhøvda í Suðurafrika.
Tak niður