Bakkafrost vil ala 100.000 tons av laksi í Føroyum

Um fimm ár skal fyritøkan klára at ala 100.000 tons av laksi í Føroyum, í kruvdari vekt. Tað er ambitiøsi málsetningurin hjá Bakkafrost, sum hevði aðalfund í gjár.

Í fjør var tøkan hjá Bakkafrost 50.000 tons í kruvdari vekt. Harafturat kemur virksemið í Skotlandi, har dóttirfelagið hjá Bakkafrosti aldi umleið 35.000 tons av laksi í kruvdari vekt.

Bakkafrost hevði góðar 460 milliónir krónur í yvirskoti í fjør. Til samanberingar var yvirskotið góðar 800 milliónir í 2019. Í stóran mun er tað heimsfarsóttin korona, sum er orsøkin til munin millum 2020 og 2019.

Íløguætlanin hjá Bakkafrost fyri tíðarskeiðið 2018-2022 er 1,8 milliard krónur. Íløguætlanin verður dagførd komandi mánaðirnar.

-Vit rokna við at gera íløgur fyri eina milliard um árið, næstu fimm árini, sigur Rúni M. Hansen, nevndarformaður.

Av hesi árligu íløgumilliardini skulu umleið 600 milliónir brúkast í Føroyum og írestandi 400 milliónirnar í Skotlandi, har pengarnir fyrst og fremst fara til nýggjar og størri smoltstøðir.

Trýst á pílin undir myndini fyri at hoyra samrøðu við Rúna M. Hansen.