- Tíðindi, mentan og ítróttur
Góðan morgun Føroyar
Eftir góð 30 ár letur Neystið í Skálavík aftur.
Í Neystinum kundu fólk keypa gerandisvørur, góðgæti og grill, men nú gevst handilin, sum er einasti av sínum slagi í bygdini.
Elisabeth Myllhamar, ið er ímyndin av Neystinum, sigur, at nú hon er blivin 70 ár, er tíðin komin at gevast.
Hon hevur arbeitt í handlinum í góð 30 ár, og fyri tað mesta hevur hon sjálv staðið aftanfyri handisldiskin.
- Tað er ikki grundarlag fyri at løna øðrum starvsfólki, sigur hon.
Tað er ein trupulleiki hjá smærru handlunum, at teir ikki fáa vørurnar fyri sama kostnað, sum størru handlarnir.
Trupult er at fáa munagóðan vinning burtur úr, men tað, sum hevur gjørt, at tað hevur borið til í Neystinum, er, at tey hava selt grillmat, heldur Elisabeth Myllhamar.
Men soleiðis verður ikki í framtíðini.
Um einar tveir dagar er alt selt, og tá verður lykilin snaraður fyri seinastu ferð.
- Nú noyðist tú burtur í bygd, um tú skalt keypa.
Hetta er serliga synd fyri tey eldri fólkini, heldur Elisabeth Myllhamar.
Øll hava ikki bil, og tí plagdi eg at koyra vøruna út til teirra, vísir hon á.
Enn er eingin, ið sigur seg hava hug at taka yvir, men kemur onkur, so skulu tey fáa tað, sum tað stendur, sigur Elisabeth Myllhamar, ið viðgongur, at hon fer at sakna sosiala týdningin, sum handilin hevur havt.
Tey allar flestu eru kedd, nú Neystið letur aftur, leggur hon aftrat.