Munandi fleiri umsóknir til Setrið

469 fólk hava søkt um at sleppa á Fróðskaparsetrið at lesa í ár. Tað eru 18 prosent fleiri enn í fjør - eisini hóast Setrið bjóðar tríggjar færri útbúgvingar í ár.

Rannvá Davadóttir, lestrarskrivstovuleiðari, metir, at orsøkin er samansett.

Fyrst og fremst metir hon, at ein orsøk er, at Setrið í størri mun hevur víst á, hvat ein kann brúka útbúgvingarnar til. Umsøkjaratalið á lestrarstovnum uttanlands er eisini hækkað í ár. Lestrarskrivstovuleiðarin metir, at umsøkjaratalið á Fróðskaparsetrinum, eins og aðrir lærustovnar úti í heimi, er ávirkað av koronufarsóttini.

Ymiskt er, hvussu nógvar umsóknir eru til hvørja útbúgving. Sjúkrarøktarfrøði, námsfrøði og læraraútbúgving eru, eins og undanfarin ár, best umtóktar.