Aleqa: Eg nýtti kortið í neyðstøðu

21.08.2016 - 17:28
AktueltÚtheimurin
Aleqa: Eg nýtti kortið í neyðstøðu
Grønlendska fólkatingskvinnan vísir aftur, at hon hevur misbrúkt eitt gjaldskort, sum Fólkatingið ræður yvir
 
 

Aleqa Hammond, fólkatingskvinna fyri Siumut, vísir aftur, at hon hevur misbrúkt eitt kredittkort, sum hon fekk útflýggjað frá Fólkatinginum, til privata nýtslu.

Ekstra Blaðið skrivar í dag, at hon hevur nýtt umleið 13.000 krónur av kortinum til privata nýtslu. Sambært einum teldupost-samskifti millum umsitingina hjá Fólkatinginum og Alequ Hammond hevur hon nýtt kortið hjá Fólkatinginum at keypa fyri í Nuuk, har hon býr.

Tá blaðið spurdi hana um málið, svaraði Aleqa Hammond, at hon hevði ongar viðmerkingar um síni fíggjarviðurskifti. Men á sínum facebook-vanga í dag vísir hon skuldsetingunum aftur.

Í neyðstøðu

Aleqa Hammond skrivar, at hon varð noydd til at brúka kortið, sum hon hevur fingið frá Fólkatinginum, í eini neyðstøðu.

- Kontur mínar vórðu misbrúktar gjøgnum iTunes í juni, men tíbetur varnaðist bankin tað, og neyðug tiltøk vórðu sett í verk. Eg havi ongantíð brúkt kortið hjá Fólkatinginum, men í hesi neyðstøðuni brúkti eg kortið, og eg kunnaði umsitingina í Fólkatinginum um tað, skrivar Aleqa Hammond á Facebook. 

- Tíverri hevur onkur óviðkomandi fingið hendur á teldupost-samskiftinum millum meg og umsitingina hjá Fólkatinginum, og hevur latið tað víðari til ein journalist hjá Ekstra Blaðnum. Tað harmast bæði eg og umsitingin um, skrivar hon.

- Tað hevur ongantíð verið ein spurningur um at misbrúka ella snýta nakran, skrivar Aleqa Hammond á Facebook.

Keypti í Keypsamtøkuni

Sambært Ekstra Blaðnum hevur Aleqa Hammond millum annað brúkt kortið hjá Fólkatinginum at keyp í Keypsamtøkuni í Nuuk og í einum ítrottahandli.

Og sambært teldupost-samskiftinum hevur umsitingin í Fólkatinginum boðað frá, at tær 13.000 krónurnar, sum eru brúktar privat, verða drignar av upphæddini á kortinum. 

Kortið kann sambært reglunum bara nýtast til eitt nú hýruvognar og ferðaseðlar til fundir, sum hava samband við fólkatingsarbeiðið. 

Nýggjastu sendingar í ÚV
Fríggjadag 17. august
Summartímin fríggjadagin 17. august
84345
Fríggjadag 17. august
Morgunlestur fríggjadagin 17. august 2018
82948
Hósdag 16. august
Summartímin hósdagin 16. august
84299
Hósdag 16. august
Trimpil (2-3:5)
83672
Hósdag 16. august
Summartímin mikudagin 15. august
84287
Nýggjastu sendingar í SV