Í apríl næsta ár fara føroysk vinnulívsfólk eftir ætlan til Tanzania og upp á hægsta fjallið í Afrika, Kilimanjaro.

- Hetta er eitt skeið, sum er ætlað teimum vinnulívsfólkunum, ið ynskja sær eina persónliga avbjóðing.

Soleiðis sigur Arne Vatnhamar, ið skipar fyri hesum heldur øðrvísi leiðaraskeiðnum. Sjálvur hevur hann sum fyrsti og einasti føroyingurin verið á heimsins hægsta fjallið, sum er Mount Everest.

- Hetta skeiðið snýr seg um at seta sær langtíðarmál og ikki minst at taka av eini stórari avbjóðing, sum tað jú er at fara niðan á Kilimanjaro, greiðir Arne Vatnhamar og heldur fram:

- Túrurin er ein avbjóðing fyri øll - eisini meg sjálvan - hóast eg havi verið hægri uppi. Og tað gevur ein kennskap til, hvat mann kann, og hvat mann orkar. Tað gevur eina ávísa ballast, sigur Arne Vatnhamar

Hóast talan er um hægsta fjallið í Afrika, nýtast leiðararnir ikki at hava tær heilt stóru royndirnar við at ganga í fjøllunum.

- Kilimanjaro er eitt av teimum kendu fjøllunum, sum er lættast at koma niðaná. Túrurin er lagdur yvir seks dagar, so mann hevur tíð at aklimatisera seg. Sjálvandi skal mann helst kunna ganga einar 10 kilometrar uttan steðg, men annars setur túrurin ikki so nógv krøv, sigur Arne Vatnhamar.