- Tíðindi, mentan og ítróttur
Nón
Í hesum døgum eru júst 100 ár liðin síðani oktober kollveltingina, tá Lenin framdi statskvett í Russlandi og rak stjórnina hjá Kerenskij frá.
Men hvør var orsøkin til russisku kollveltingina og hvønn týdning hevði kollveltingin fyri heimin? Hesar og aðrar spurningar fáa vit útgreinaðar, tá Hans Andrias Sølvará, søgufrøðingur, kemur á gátt.
Vit fara eisini at seta kommunismuna í eitt søguligt, mentanarligt og filosofiskt perspektiv, tá Hanus Kamban, rithøvundur, og Jógvan D. Hansen, heimsspekingur, koma á gátt.
Hvussu var at vaksa upp í Sovjetsamveldinum, og hvussu upplivdi tú sum russari glasnost og peristrojka? ÍHesar og aðrar spurningar umrøða vit við Katja Volovelskaja, ið er fødd og uppvaksin í Sankta Pætursborg.
Vit spyrja eisini í hvønn mun føroyska arbeiðararørslan hevur fingið íblástur eystanífrá. Helgi Eidesgaard, søgufrøðingur, hevur skrivað bók um Havnar Arbeiðsmannafelag.
Í hvønn mun tóku føroyingar undir við kommunismuni og Sovjetsamveldinum? Vit spyrja Elin Hendriksen og Marnu Jacobsen, sum vóru partar av føroyska umhvørvinum á vinstraveinginum í sjeytiárunum.
Tá talan er um popp- og rocktónleik, er Sovjetsamveldið ikki landið, ið oftast hevur verið á alheims hittlistunum. Men tað er komið fyri ? og tað venda vit aftur til í Dagsins klassikara.