Kiasmos gevur út fyrstu fløguna

Føroyski Janus Rasmussen, sum vit kenna frá millum annað Byrta og Bloodgroup, er í løtuni í holt við enn eina tónleikaverkætlan.

Saman við íslendinginum Ólafur Arnalds manna teir elektroniska tónleikabólkin Kiasmos.

Hóast bólkurin bleiv stovnaður í 2009, er tað fyrst í dag, at fyrsta fløga teirra kemur út. Teir hava báðir havt nógv at gera við ymiskum ørðum verkætlanum, men eru nú klárir at vísa okkum, hvat Kiasmos er fyri nakað.

Ólafur plagdi at arbeiða sum ljóðtøknikari á ørðum verkætlanum hjá Janusi, og tað var her, at teir uppdagaðu teirra felags kærleika fyri minimalistiskum, eksperimerandi tónleiki. 

Ólafur er kendur fyri sína framúrskarandi blanding av minimalistiskum klaverspæli og streingja samanseting við elektroniskum ljóðum. Janus er kendur sum heilin aftanfyri elektronisku popp greinina. 

Burtur úr hesum hava teir megnað, at samanseta og víðari byggja teirra ljóð fagurfrøði til at fullfíggja eina fløgu.

Tú kanst hoyra ljóðbrot av fløguni, sum í dag eisini kann ognast, her.