Björk: Nýggj útgáva innan 24 tímar

Kenda íslendska sangarinnan, Björk, kunngjørdi herfyri, at næsta útgávan, Vulnicura, skuldi koma út í mars, men hetta er ikki longur tilfellið.

Björk hevur á Facebook síðu síni kunngjørt, at útgávan kemur út innan næstu 24 tímarnar. Nýggja fløgan er longu komin á amerikanska iTunes og kemur út til restina av heiminum innan komandi døgnið.

Sambært heimasíðuni "Consequence of Sound" sigst, at fløgan kemur út nú, orsakað einum "leka" á alnetinum. (Tað vil siga, at tað av óvart er endað á alnetinum, red.) 

Hóast vit ikki eru komin langt inn í nýggja árið, er hetta aðru ferð í 2015, at ein samsvarandi "leki" hendir. Seinast vóru tað óliðug løg frá fløguni "Rebel Heart" hjá Madonna, sum endaðu á alnetinum. 

"Vulnicura" er níggjunda altjóða studiofløgan hjá Björk, síðani "Debut" kom út í 1993. 

Kelda: consequenceofsound.net