Heathrow er ikki longur ferðamiklasti flogvøllur

Heilt inntil 2014 hevur Heathrow verið ferðamiklasti flogvøllur og hevur sostatt verið tann flogvøllurin, ið hevur tikið ímóti flest altjóðaligum ferðafólki.

Í 2014 kom talið upp á 68,1 mió. ferðafólk, men hetta var ikki nóg mikið til at varðveita fremsta plássið sum ferðamiklasti flogvøllur, skrivar Jyllands-posten.

Við eini framgongd á 6,1% og 70,5 mió. ferðafólkum bleiv flogvøllurin í Dubai nummar eitt.

Leiðarin á flogvøllinum í Dubai, Sheikh Ahmed Bin Saeed Al Maktoum, sigur, at tað er eitt felags mál at gera Dubai til ein altjóða miðdepil fyri flogferðslu, og at hetta verður klárað við opna politikkinum í Dubai. Harumframt er Dubai vorðin ein handils- og ferðafólkamiðdepil, sum tiltrekkir fleiri og fleiri ferðafolk, sigur hann.

Ein talskvinna hjá Heathrow sigur, at Stórabretland hevur í 350 ár verið størsti depil fyri skip og síðan flogfør, men grundað á vantandi pláss og arbeiðskraft má Heathrow geva trónuna víðari.