Amy Winehouse hittar aftur

Dokumentarfilmurin AMY, ið snýr seg um nógv umrøddu songkvinnuna, Amy Winehouse, bleiv møttur við nógvum fagnaða frá ummælarum, tá hann bleiv frumsýndur á filmfestivalinum í Cannes.

Sambært ummælarum bjóðar filmurin hyggjarum eina vakra og djúptøkna lýsing av lívinum, tónleikinum og syrgiligu lagnuni hjá songkvinnuni, ið doyði av eini yvirdosis í 2011, einans 27 ára gomul.

Forfilmurin til AMY bleiv avdúkaður fyri nøkrum døgum síðani, og í honum síggja vit, at leikstjórin, Asif Kapadias, m.a brúkar privat filmsbrot av songkvinnuni til at fortelja søgu hennara.

Nærgongdi frásagnaðarhátturin hjá leikstjóranum hevur tó fingið fyrrverandi mann hennara, Blake Fielder-Civil, og pápa hennara, Mithcell Winehouse, ið ikki eru framstillaðir í besta ljósi, til alment at taka frástøðu frá filminum.

Sambært leikstjóranum er filmurin tó ein objektiv frásøgn, ið er bygd á samrøður við fólk, ið kendu songkvinnuna væl. 

Filmurin verður frumsýndur 30. juli í Danmark, men enn er tó ikki greitt, nær hann verður sýndur í Føroyum.

Kelda: Gaffa