Bókligt vikuskifti

Bókadagar eru í Norðurlandahúsinum um vikuskiftið. Bókadagar seta ljós á alskyns bókmentir, tað veri seg bøkur, bókaprát og skapandi orð. 

Bókadagarnir undanfarin ár hava verið sera væl umtóktir, og við eini spennandi skrá verða teir væntandi minst líka spennandi aftur í ár. 

Ung skøld

Fleiri ung hava tikið pennin í hond og skrivað føgur orð seinasta árið. 20 ára gamla Anna Malan Jógvansdóttir gav í vár yrkingasavnið, Undirfloyma, út. Hon fer at leggja savnið fram sunnudagin kl. 14.00 í Norðurstovu. 

Les eisini: Anna Malan Jógvansdóttir júst givið yrkingasavn út

650 orð hava mong hoyrt í Góðan Morgun Føroyar. Tátturin snúði seg um, at fólk kundu senda eina søgu inn til GMF, sum í mesta lagi var 650 orð til longdar. Rakel Helsmdal valdi bestu søgurnar út og las tær upp í útvarpinum. Nú eru 62 søgur valdar út og prentaðar í spildurnýggjari bók, Nýtt flog. Millum teirra, sum sendu inn, vóru 16 ára Annika Dalsgaard og 18 ára Poula Eyðbjørnsdóttir. Tær eiga nakrar av søgunum í Nýggjum flogi, og verða tær eisini til staðar til Bókdagarnar. Bókin verður løgd fram leygardagin kl. 16.00 í Norðurstovu. 

Les eisini: Skaldið: Annika Dalsgaard

Næmingar á Føroya Fólkaháskúla standa fyri LabORÐatorium, sum verður í Skálanum allan leygardagin og sunnudagin. Á labORÐatoriinum fara næmingar at gera alskyns royndir við at fáa orðini visuel, musisk og skaldaborðin. Fyrireikararnir av labORÐatoriinum siga at hetta er ikki ein liðug framsýning, men eitt LabORÐatorium, eitt slag av skapandi royndarstovu, har vit saman villast inn í bøkur, bókstavir og orð. Á skránni verður m.a. Snóratræs- yrkingar, stiga-orð, bókstavir ad libitum, orðaleysir films- stubbar, bókaummæli, og mangt mangt annað.