Filmslistafólkið velur yndisfilmar

Alien

Leikstjóri: Ridley Scott

Ár:  1979

Mál og land: enskt og USA/Ongland

Longd: 117 minuttir

Eitt sindur um filmin:

Rúmdarfarið ”Nostromo” fær eitt løgið signal frá eini ókendari gongustjørnu. Rúmdarfararnir kanna málið á ókendu planetini uttan úrslit, men fáa her eitt vandamikið ‘alien’ umborð á rúmdarfarið.

Hetta er ein mílateinur innan sci-fi sjangruna. Tá hann kom út, spjaddi filmurin ræðslu, tí hann var so ógvisligur.

Hví dámar tær júst hendan filmin?

Mær hevur altíð dámt sci-fi, og hesin filmurin var líkasum tann, ið byrjaði alt. Filmurin hevur lágt tempo í mun til filmar í dag, men tað er eisini tað, sum ger hann so sermerktan. Stemningurin verður spakuliga bygdur upp, soleiðis at klimaksið verður so nógv meira ræðandi.

Special-effektirnar eru øgiliga væl gjørdar og “ektaðar” í mun til nú. Í dag verður nógv animerað, og hetta kann kanska gera, at hyggjarin ikki hugsavnar seg um søguna á sama hátt. Tónleikurin er eisini perfekt komponeraður til filmin, og filmurin er filmslistarliga ógvuliga vakur.

Mær dámar stórt sæð alt, sum Ridley Scott ger, sera væl, men Prometheus skuffaði tó ógvusliga.

The Avengers

Leikstjóri: Joss Whedon

Ár:  2012

Mál og land: enskt og USA

Longd: 143 minuttir (173 extended cut)

Eitt sindur um filmin

Nick Fury savnar saman toymið “The Avengers” at bjarga heiminum frá tí ónda Loka, tí hann hevur stolið eitt sera farligt vápn.

Hví dámar tær júst hendan filmin?

Hendan filmin havi eg valt, tí hann stutt sagt bara er gott undirhald. Søgan er løtt, væl skrivað og proppað við action. Mann kann bara kobla av og njóta filmin uttan at keða seg. Mær dámar eisini sera væl langa bardagabrotið, tí tað er so væl samansett, og eg haldi, at leikstjórin vísir yvirskot við at javnviga humor og action/álvara so væl.

The Wind Rises

Leikstjóri: Hayao Miyazaki

Ár:  2013

Mál og land: japanskt, týskt, franskt og italienskt / Japan

Longd: 126 minuttir

Eitt sindur um filmin

Vit fylgja Jiro frá tí, at hann er lítil, til hann verður stórur og teknar flogfør til annan heimsbardaga.

Hví dámar tær júst hendan filmin?

Sum heild dámar mær væl stílin og einføldu, men sterku frásagnirnar hjá Hayao Miyazaki. Allir hansara filmar hava temu sum kríggj, umhvørvi, og hvussu heimurin kann oyðast, um ikki vit ansa eftir honum. Bakgrundirnar og animatiónirnar eru sera, sera vakrar og ser-japanskar, og hetta dámar mær ógvuliga væl. Eisini er tónleikurin væl komponeraður til at undirbyggja søguna.

Eg haldi, at hetta er ein lívsjáttandi filmur, tí hann er fullur av kenslum, og mann líkasum fer gjøgnum sítt egna lítla ‘Katharsis’ ella sálarreinsan.