Íslendski forsetin vil steðga ananas á pitsa

- Eg eri heilt grundleggjandi ímóti ananas sum pitsafyllu.

Soleiðis segði íslendski forsetin, Guðni Th. Jóhannesson, tá hann vitjaði ein skúla í Akureyri. Næmingarnir í skúlanum sluppu at spyrja hann ymiskt, har hann millum annað segði, at í Premier League dámar honum best Manchester United.

Men skegast av øllum var, tá hann blandaði seg uppí kjakið um, hvørt ananas hoyrir heima á eini pitsa ella ikki. Umframt at hann segði seg vera ímóti tí, segði hann víðari, at stóð tað til hann, hevði hann sjálvandi bannað tí við lóg.

Hetta kjakið hevur verið rættiliga nógv frammi millum ung. Tað hevur mestsum verið skemt, og har eru enntá fleiri memes um tað.

Summi fegnast, meðan onnur eru óð um forsetan. Á heimasíðuni Visir.is er møguligt at viðmerkja, og har hava fleiri sagt sína hugsan.

- Endiliga ein verðinsmaður, eg kann líta á, skrivar ein viðmerkjari.

- Landasvíkjari!! skrivar ein annar viðmerkjari, allarhelst skemtiliga.

Hóast vit eru fleiri, ið gleðast um hesi tíðindi, verður hetta neyvan veruleiki. Hóast forsetin skemtar, hevði hann ikki kunnað gjørt nakað óansæð, tí forsetin avger nevniliga ikki so nógv í Íslandi.

Kelda: Visir.is