Studentaskúlin í vøkru Hoydølum
Vilt tú søkja inn á Studentaskúlan í Hoydølum?
Julia Helena Dal Henriksen er fødd 9. januar 2001. Hetta merkir, at vanliga hevði hon verið ein árgang ov ung at byrja síðsta summar og átti sostatt at byrjað komandi skúlaár. Hóast hetta gongur hon longu í 1.s. í Hoydølum. Røddin hevur tosað við hana um, hvussu tað er at ganga í Hoydølum.
14.03.2017 - 19:00

Studentaskúlin, ella Glasir, ið tað eitur nú, er gymnasialt miðnám í Tórsavn. Útbúgvingin tekur 3 ár, og tú kanst nú velja millum fýra breytir: búskaparbreyt, fyrireikingarbreyt, hugbreyt og náttúrubreyt. Náttúrubreyt og hugbreyt eru tað, ið fyrr varð kallað matematiska- og málsligadeild. Innan hesar breytir eru aftur ymsar leiðir, ið gera, at tú kanst skræddaraseyma tína útbúgving enn meira. 

 

Umframt eitt læruríkt lestrarumhvørvi er eisini eitt virkið næmingaráð, ið javnan skipar fyri tiltøkum og veitslum.

 

Tó hevur skúlin ikki besta umdømið. Í fólkaskúlanum hoyrir mann næstan bara ræðusøgur um, hvussu tað verður ein kollvelting frá vanligu skúlagongdini at fara í student. Ræðusøgur um, hvussu torført tað fer at verða at koma ígjøgnum øll trý árini.

 

Hetta ásannar Julia Helena, men hon er ósamd í hesum.

 

- Eg havi altíð fingið at vita í fólkaskúlanum, at student fer at verða so nógv verri. Men soleiðis hevur tað eisini verið, tá eg eri farin úr 7. til 8. og úr 8. í 9., men tað hevur ikki verið nakar trupulleiki. Tað er tí, eg gjøgnum árini sjálv havi ment meg. Sjálvandi er munur á fólkaskúlanum og student, men um ein tímir nøkunlunda væl, fylgir við frá byrjanini og ger sínar uppgávur, so skuldi tað nokk gingið.

 

Sum sagt er Julia Helena yngri enn floksfelagir sínir, men hon heldur seg ikki lýsa burtur úr hinum. Hon sigur, at hennara aldur ikki hevur so stóra ávirkan á hvørki skúlagongd ella floksfelagar. Hon hevur altíð gingið ein árgang eldri, enn hon er, og hon kennir seg tískil líka sum hini. Tí hugsa hvørki hon ella tey í flokkinum um, at hon er yngri.

 

- Eg vil avgjørt viðmæla teimum, sum hugsa um at fara í student, at søkja inn, tí at tað er ikki so ringt, sum mann heldur. Mær dámar væl at ganga her, og eg havi fingið nógvar nýggjar vinir. Um tú ivast í at fara í student ella í Námx, kanst tú altíð søkja inn og taka støðu til, hvat tú hevur hug til seinni.

 

Freistin at søkja inn á Glasir eins og hinar miðnámsskúlarnar er 15. mars.

 

 
 

 

 

Kropsfatanistar - Vit mugu bróta eitt tabu Tað er nógv ting vit tosa lítið um og so er tað summi ting vit slett ikki tosa um. Her hevur Røddin gjørt samrøðu við Signhild og Sunnvá sum á...
Yvirlit: tiltøk, konsertir og sjónleikir næstu tíðina
Føroyskir skiftisnæmingar - dreymurin um tí stóru verð
Alt tú skalt vita, áðrenn tú byrjar miðnám Tíðin er komin har gamlir vanar vera lagdir til síðis og alt broytist.
Video: Magnus fer sunnudagin til Portugal at sparka fótbólt 18 ára gamli Magnus Holm, sum hevur gjørt um seg bæði á ungdóms landsliðinum og besta liðnum hjá B36, tekur nú næsta stigið í hansara fótbóltskarieru...