- Tíðindi, mentan og ítróttur
Við Tórði á túri
Jónas Berthelsen er sjóvarmaður í báðar ættir og hann greiðir livandi frá ymiskum viðurskiftum við Sjógv.
21 ára gamla Annika Christiansen og onglendingurin, Mark Sanders, búgva við Sjógv beint nú, men tey hava eina greiða ætlan um at fara aftur til Moldova, har tey hava verið við í hjálpararbeiði og missión. Men áðrenn tey fara skulu tey giftast. Annika hevur kortini ein dreym um einaferð í framtíðini at flyta aftur í heimbygdina.
Eitt nýtt kirkjuhús er bygt við síðuna av gomlu Sjóvar kirkju, og har fara tey ymisku sosialu tiltøkini hjá kirkjuni fram. Saman við dekninum Hansu Petersen vitja vit kirkjuna og nýggja kirkjuhúsið.
Niels Jacob Th. Nielsen eigur gamla handilin Sjóvarhøvda, ið er frá 1860. Har stendur alt sum tað stóð, tá handilin stongdi fyri nógvum árum síðani. Niels Jacob ætlar, at Sjóvarhøvdi í framtíðini skal verða eitt savn, so fólk kunnu vitja ein gamlan handil, sum eisini hevði reiðaravirki.
Unga parið Ninna Katrin Johansen og Carsten Bang, sum vanliga búgva í Aalborg, eru komin til Sjóvar at búgva í eina tíð. Ninna Katrin sigur, at tað var ein avtala, tá tey komu saman, at um møguleikin beyðst, skuldu tey til Strendur at búgva í eina tíð. Hon hevur barnsburðarfarloyvi nú og tey spæla bæði hondbólt við StÍF.
Selma Johansen og Pole J. Hansen eru bæði frá Sjógv, men tey hava búð longur úti á Strondum í nógv ár. Nú eru tey flutt aftur til Sjóvar og í barnaheimið hjá Selmu. Hetta eru tey fegin um.