- Tíðindi, mentan og ítróttur
Við Tórði á túri
Tað er Sólgerð Andreassen, sum er í ferð við at fáa søguna út í bók. Tey fyrstu settu búgv har í 1924 og niðursetufólkini komu ymsa staðni úr landinum. Í sendingini greiðir Sólgerð eisini frá ymiskum upplivingum í sínum barna- og ungdómsárum á Oyrarbakka.
Pápi hennara, Tummas Anthoniussen, er oyndfirðingur. Hann kom sum ungur til Oyrarbakka at gera okkurt arbeiði sum elektrikari, og her fann hann sær konu og setti búgv. Eina tíð arbeiddi hann í Mjørkadali og ofta koyrdi hann norður við motorsúkklu, og kom um sundið við einum lítlum ferjubáti, sum røkti rutu um sundið.
Nógv fólk koyra dagliga framvið Oyrarbakka og vita lítið ella einki um hesa bygdina. Men eitt stað, ið mong steðga á, er við Magnstøðina við Streymin. Bjørg Niclassen og Hansa Hansen, ið standa innafyri skivuna á støðini, siga, at nógv fólk steðga á at keypa brennievni, og summi koma inn at keypa kaffi, so tey ikki sovna meðan tey koyra.
Hjúnini Rose Sarr Hjaltalin og René Hjaltalin eru millum mongu tilflytararnar á Oyrarbakka. Hon er úr Senegal og hann úr Havn og tey trívast væl á Oyrarbakka. Rose kom til Føroya fyri 10 árum síðani og setti sær fyri at læra seg føroyskt. Tað hevur gingið skjótt. Rose tosar væl føroyskt og hon arbeiðir hjá Samskipum í Hoyvík og kemur nógv saman við fólki. René arbeiðir hjá Landsverki á Lambareiði.
Hjúnini Birna og Hans Pauli Larsen eru millum eldsálirnar í lokala kappróðrarfelagnum, sum hevur heimstað á Oyrarbakka. 5-mannafarið Hvassi hevur mangan vunnið og tey bæði siga, at kappróðrarfelagið hevur stóran týdning fyri bygdirnar Oyri, Oyrarbakka og Norðskála.
Tað hevur drigið út at fingið neyðugu loyvini frá friðingarmyndugleikunum til náttúrulundina við Streymin. Stigtakarin, Edmund Joensen, sigur, at nú er leyst úr botni og fyri fáum døgum síðani varð sáttmálin við tey, ið hava átt jørðina, undirskrivaður. Nú er arbeiðið at gera gøtur byrjað og so verður farið at gróðurseta trø. Edmund sigur, at økið er tilsamans 130.000 fermetrar og 70.000 trø skulu setast niður.