Í breddanum í dag seta vit millum annað sjóneykuna á rentur, bústaðarlán og skuldarbyrðu. Tí hvør er munurin á innlánsrentu og útlánsrentu? Fer rentustøði at hækka ella lækka í nærmastu framtíð ? Og standa føroysk húsarhald við skegginum í postkassanum, um rentan hækkar bara eitt lítið sindur?

Útlendskir miðlar vilja vera við, at útlánsrentan fer at hækka kring heimin. Eingin veit hvussu nógv ella í hvørjum londum rentan fer at hækka, men prátið gongur í bankaverðini. Vit spyrja tí Turið Finnbogadóttir Arge, rakstrarstjóra í Bank Nordik, um føroysku bankarnir síggja tekin uppá, at rentan fer at hækka í Føroyum í næstum.

Í Íslandi er loft nú sett á útlánini fyri at fyribyrga einum bløðrubresti á bústaðarmarknaðinum. Útreiðslurnar til bústaðarlán mugu ikki vera meira enn 35 prosent av mánaðarligu inntøkuni eftir skatt og frádráttir, boðar íslendski tjóðbankin frá. Vit ringja til Íslands og tosa við varastjóran í Seðlabanka Íslands, Gunnar Jakobsson.

Og so vitjar Malan Johansen, landsbankastjóri og forkvinna í Váðaráði Føroya, í útvarpsstovuni. 

Sendingina gjørdu Hallur av Rana og Arnfríð Joensen Dahl, sum eisini var redaktørur.