Færri fólk flyta av landinum, trýstið á bústaðarmarknaðin veksur og húsaprísirnir hækka. Tó eru prísirnir lutfalsliga ikki hægri enn teir hava verið áður, men tað ERU samfelagsbólkar, sum ikki fáa fígging at keypa sær hús - serliga í høvuðsstaðarøkinum.

Tó er tilflytingin ikki størsta orsøkin til vøksturin í fólkatalinum. Í staðin skal høvuðsorsøkin finnast í hinum endanum - talið av fólkum, sum verða verandi í Føroyum. Og tað eru serliga tvey økir í landinum har fólk ynskja at búsetast - Suðurstreymoy og Eysturoy. Tað sigur hagfrøðingur á Hagstovu Føroya.

Men tað verður alsamt dýrari og truplari at ogna sær bústað í Føroyum.

Eitt nýtt yvirlit, sum Betri hevur gjørt, vísir, at sethúsaprísirnir framvegis hækka, hóast vøksturin er eitt sindur minni í løtuni, enn hann áður hevur verið. Miðal prísurin fyri eini sethús í Føroyum er í løtuni 2,2 milliónir krónur. Men skalt tú keypa hús í høvuðsstaðarøkinum, so er miðal prísurin 3,5 milliónir krónur.

Betri samtakið hevur í fleiri ár savnað hagtøl um sethúsaprísirnar í Føroyum. Ein av bankastjórunum í Betri, Olav Guttesen, greiðir frá í Breddanum.

Í Betri Heimi hava tey fingurin á pulsinum viðvíkjandi dagligu handlunum við fastognum. Seinna hálvár í ár hava tey selt færri sethús enn vanligt hevur verið seinastu tíðina. Kára á Dunga, stjóri í Betri Heimi, vitjar í útvarpsstovuni. Eisini vitjar talskvinnan í áhugafelagnum Búgva í útvarpsstovuni.

Sendingina gjørdu Hallur av Rana, John Johannesen og Arnfríð Joensen Dahl, sum eisini var redaktørur.