Støðan er spent í løgtinginum í hesum døgum - Ætlanin at seta ein kanningarstjóra at kanna útlutanina av kvotum í fiskimálaráðnum spøkir. 14 undirskriftir skulu til, og andstøðan hevur boðað frá, at hon tekur undir við at seta ein kanningarstjóra, men hvussu við samgonguni? 

Vit lodda dýpið í tinginum í dag, og viðgera støðuna við politiskum viðmerkjarum í útvarpsstovuni

Spurningurin hevur ligið í luftini í nakrar vikur nú, men nú tykist svarið at vera á gáttini. 

Og søguliga sæð hava vit gjørt brúk av kanningarstjórum í fleiri førum. Um ein kanningarstjóri verður settur í hesum føri, verður tað níggjundu ferð, at formannskapurin í løgtinginum fær eina áheitan um at seta ein kanningarstjóra.

Og nú verður helst aftur ein kanningarstjóri settur. 

Grein 38 stykki 2 í stýrisskipanarlógini sigur, at tveir fimtingar av tinginum hava rætt til at krevja, at kanningarstjóri verður settur. Við núverandi tingmannatalið er sostatt neyðugt við 14 undirskriftum.

Í sendingini tosa vit við umboð fyri andstøðu og samgongu. Eisini vitjar Eirikur Lindenskov í útvarpsstovuni.

Sendingina gjørdu Krista Johnsdóttir Kreutzman, Hallur av Rana og Arnfríð Joensen Dahl, sum eisini var redaktørur.