Ruðuleikin í Bústøðum fær ongan enda. 

Tað byrjaði við eini nýggjari starvsskipan fyri Bústaðir, og nú er rokið í Bústøðum komi á tingsins røðarapall.

Fyri eini viku síðani kom fram í Breddanum, at stýrisformaðurin í Bústøðum, Regin Hammer,  hevur sett Andras Róin til viks sum stjóra í Bústøðum og at ósemja valdar í stýrinum. Ein nýggj áseting í starvsskipanini fyri Bústaðir hevur við sær, at stjórin, Andras Róin, sleppur hvørki at tosa við miðlar ella annars at kunna um bústaðarfelagið uttan góðkenning frá Regini Hammer.

Dagin eftir at søgan um Bústaðir var í Breddanum, var Regin Hammer í Degi og Viku, har hann varð spurdur um nýggju starvsskipanina og um rokið í Bústøðum. Nakrar dagar seinni senda starvsfólkini í Bústøðum eina áheitan til Elsebeth Mercedis Gunnleygsdóttur, landsstýriskvinnu.

Starvsfólkini skriva millum annað, at landsstýriskvinnan ikki skal seta nýggju reglurnar í gildið, har stjórin verður bundin niður í tøgn og ikki sleppur at úttala seg alment vegna Bústaðir, uttan at tað verður filtrera gjøgnum nevndarformannin. Tí tað er at taka álitið á stjóranum burtur og samstundis niðurgera hann sum stjóra og er við til at máa eldhuga hansara burtur.

Týsdagin var Regin Hammer aftur í Degi og Viku. Tað var í samband við eitt skriv frá stýrisformanninum til miðlarnar. Í skrivinum vísir hann á, at í løtuni sær støðan út til at vera, at Bústaðir stevna beint ímóti gjaldføristrupulleikum.
- Í roknskapinum er ilt at fáa eyka á pengar til viðlíkahald, umbyggingar og nýbyggingar í framtíðini. Henda gongdin má steðga, skrivar hann.

Og í gjár sendu stýrislimirnir Emmy Sandberg Joensen og Una Joensen eisini eitt tíðindaskriv til føroyskar miðlar. Tær taka her frástøðu frá tí, sum stýrisformaðurin hevur ført fram um Bústaðir.

Orðaskiftið í tinginum í gjár var heitt, og fleiri av munnligu fyrispurningunum snúðu seg um støðuna í Bústøðum. Har vóru fyrispurningar frá bæði andstøðu- og samgongutinglimum.

Í sendingini taka vit samanum málið um ruðuleikan í Bústøðum, vit tosað við politikarar og hoyra ljóðbrot úr tinginum. Eisini vitjar Jóhann Lützen, stjóri á Norðlýsinum og politiskur viðmerkjari, í útvarpsstovuni.

Sendingina gjørdu Krista Johnsdóttir Kreutzman, Hallur av Rana og Arnfríð Joensen Dahl, sum eisini var redaktørur.