Undirtøkan hjá Joe Biden, forseta í USA, gongur bert skeivan veg síðani hann kom framat sessinum.

Heimasíðan five-thirty-eight hevur lagt saman allar meiningakanningar, og samanteljingin vísir, at 42,8 prosent í løtuni taka undir við tí forsetin ger. 51,6 prosent gera ikki.

Tað er tó ikki nakað óhoyrt, at undirtøkan hjá forsetum dalar eftir teir eru komnir til valdið. Als ikki. Men tølini hjá Biden eru sera lág. Tað er bert ein forseti, sum hevur staðið seg verri eftir somu tíð í forsetasessinum. Tað er Donald Trump. 37,9 prosent søgdu seg taka undir við tí hann gjørdi tá hann hevði sitið eins leingi og Biden hevur nú.

Hvat er hent síðani valið, hvar er optimisman blivin av og hvat er tað fyri avbjóðingar, sum standa fyri framman hjá amerikanska forsetanum, nú tað er eitt ár síðani hann var valdur. Hetta spyrja vit gestirnar í útvarpsstovuni, Regin Berg og Tóra Højgaard, um.

Koronupass í Føroyum

Leygardagin kemur tilmælið um koronupass í gildi í føroyska samfelagnum. Nógv kjak hevur verið um koronupassið - summi halda tað er uppá tíðina, at vit fara at brúka koronupassið, meðan onnur halda, at tað er at taka frælsi frá fólki. Men hvat er koronupassið fyri nakað - og hvussu fer hetta í roynd og veru at virka?

Michael Boolsen, fúti og formaður í farsóttarnevndini, vitjar í útvarpsstovuni og greiðir frá koronupassinum.

Luttakarar í sendingini: Tóri Højgaard, løgfrøðingur, Regin Berg, stjórnmálafrøðingur, og Michael Boolsen, fúti og formaður í Farsóttarnevndini.

Sendingina gjørdu Tróndur Olsen og Arnfríð Joensen Dahl, sum eisini var redaktørur.