- Tíðindi, mentan og ítróttur
Breddin
Sjófeingi er talgilt undirvísingartilfar til børn í 4.- 6. flokk í fakinum náttúra og tøkni, ið snýr seg um fiskivinnu og alivinnu.
Bakkafrost hevur fíggjað sjálvan undirvísingarpallin við 300.000 krónum, meðan granskingargrunnurin Sjókovin hevur gjørt undirvísingartilfarið uttan kostnað. Sjókovin er ein granskingargrunnur, ið er fíggjaður av nøkrum av størstu aktørunum í føroysku fiski- og alivinnuni.
Undirvísingartilfarið var liðugt í september, men áðrenn tað mátti stjórin í Námi, Eyðun Gaard, skriva eina frágreiðing til landsstýrismannin í mentamálum, tá tað kom fram, at alifyritøkurnar Bakkafrost og Hiddenfjord, saman við reiðaríðunum Christian í Grótinum, Framherja og Varðanum skuldu fíggja og skriva undirvísingartilfarið undir redaktionellu ábyurgdini hjá Námi.
Í frágreiðingini til landsstýrismannin greiðir Nám frá, at bagrundin til tilfarið er, at Bakkafrost í august í 2019 vendir sær til Nám við fyrispurningi, um tey hjá Námi er áhugað í at samstarva um undirvísingartilfar, ið snýr seg um burðardygd.
Bakkafrost bjóðar Námi 300.000 krónur til ein talgildan undirvísingarpall , og Nám bindur seg samstundis til at gera undirvísingartilfar um fiskivinnu og aling. Útbjóðingartilfarið nágreinar millum annað hvørja fatan av alivinnuni børnini skulu sita eftir við
Har stóð millum annað: "Undirvísingin skal miðja ímóti, at børnini læra at skyna á hvussu ábyrgdarfullur sjóðarskurður til, dømis laksaaling, kann vera við til at tryggja føði og matartrygd".
Men samskiftið millum Bakkafrost og Nám vísir, at Bakkafrost krevur at evnið skal vera aling og at Sjófeingi millum annað skal læra skúlabørn at laksaaling er burðardyggur matur og er av stórum týdningi.
Bakkafrost slapp tískil at leggja seg út í orðingina av útbjóðingartilfarinum, so at tað bleiv eitt krav, at børnini í 4. - 6. flokki skilja, at laksaaling er avgerandi fyri at tryggja føði og matartrygd í heiminum í framtíðini.
Eyðun Gaard stjóri í Námi hevur annars sagt, at Bakkafrost als ikki hevur lagt seg út í innihaldið á talgilda undirvísingarpallinum, sum tey hava rindað 300.000 krónur til.
Í útvarpsstovuni kjakast Sára Gøthe Magnusdóttir, ið gongur í 9.flokki á Skúlanum á Fløtum og situr í næmingaráðnum, Kristianna Mortansdóttir, sum er lærari, lestrarvegleiðari og foreldur, Helena Dam á Neystabø, sum er leiðari á Útbúgvingardeildini í Mentamálaráðnum og við í telefonini er eisini Jónleif Johannesen, sum er formaður í Skúlaleiðarafelagnum.
Gjørt sendingin hava Arnfríð Joensen Dahl, Jón Brian Hvidtfeldt og John Johannesen, sum eisini var redaktørur.