- Tíðindi, mentan og ítróttur
Breddin
Fyri júst einum ári síðani var Evropa meira ella minni afturlatið, tí koronusmittan gjørdi so nógv um seg.
Hetta farna árið eru nógv fólk blivin koppsett móti koronu, men kortini heldur smittutalið fram við at vaksa á okkara leiðum. Fyri at fáa tamarhald á støðuni aftur, hava fleiri lond í Evropa tí valt at seta strangari koronutiltøk í verk enn nakrantíð áður. Og tað hevur loypt øði í fólk.
Í Írlandi skulu pubbir stongja á midnátt, Í Belgia skulu fólk arbeiða 4 utav 5 døgum heima næstu tríggjar vikurnar, í Týsklandi skulu øll sum arbeiða í heilsu- og røktargeiranum koppsetast, í Slovakia skulu fólk í fult lockdown um tey ikki eru koppsett, Í Hollandi, har smittutalið er vaksandi í løtuni, skulu fólk lutvíst í lockdown. Eisini skulu hollendarar vísa koronupass og brúka munnbind. Í Danmark ætlar stjórnin, at øll sum arbeiða fyri tað almenna skulu koppsetast OG summastaðni í Grønlandi sleppa tey, sum ikki eru koppsett, ikki at uppihalda seg á ymiskum almennum støðum.
Og so eru tað londini, sum eru enn meira víðgongd. Í Eysturríki eru bert 64 prosent av borgarunum koppsettir við tveimum prikum, tí valdi stjórnin at innføra lockdown fyri øll, ið ikki eru koppsett. Tað merkir, at ókoppsett fólk kunnu bert fara heimanifrá, um tey skulu til arbeiðis, at keypa inn ella líknandi. Um reglurnar ikki verða fylgdar, so er bótin 10.000 krónur.
Kanslarin í Eysturríki, Alexander Schallenberg hevur eisini boðað frá, at allir eysturríkar skulu vera koppsettir í februar 2022.
Í sendingini í dag eru gestir í útvarpsstovuna, sum skifta orð um herd koronuátøk eru ein fyrimunur ella ein vansi fyri demokratiska samfelagið.
Luttakarar: Linnéa Lindenskov Petersen, lesandi í Amsterdam, Heini í Skorini, Ph.d. í altjóða politikki og Pál Weihe, professari í fólkaheilsu.
Gjørt sendingina hava Kaj Joensen og Arnfríð Joensen Dahl, sum eisini var redaktørur.