- Tíðindi, mentan og ítróttur
Breddin
Løgtingið fer í dag at samtykkja heimild til landsstýrið at játta 9 milliónir krónur til sonevndu koltursætlanina hjá Tjóðsavninum. Játtanin er treytað av, at Tjóðsavnið fær uttanhýsis fígging til restina av koltursætlanini, sum í alt er mett kosta 65 milliónir krónur. Ætlanin fevnir um varðveiting og nýbygging av býlingum í Koltri og um at endurskapa upprunaligu náttúruna í oynni. Vit ringdu til bóndan í Koltri, Bjørn Patursson, um hvat gerast skal í oynni, og høvdu stjóran á Tjóðsavninum, Herleif Hammer, í útvarpsstovuni at skifta orð um ætlanina.
Eftir nógvar harðskapstilburðir í náttarlívinum í Havn, hava politistafelagið og onnur við teimum sett fram ynski um at fáa sett upp nøkur vakmyndatól í miðbýum. Eitt nú uttan fyri dansistøð, og har nógv fólk annars møtast um vikuskiftið. Hetta hevur Dátueftirlitið avvíst, tí lógarheimild er ikki fyri hesum.
Ein sum sigur seg stuðla politistafelagnum og teimum, ið ynskja vakmyndatól, er Heðin Mortensen, borgarstjóri í Havn, sum heldur, at borgararnir í kommununi skulu kenna seg tryggar, tá teir fara í býum. Og kunnu vakmyndatól vera við til at skapa størri tryggleika, ja, so eigur kommunan at fáa loyvi til at seta slík upp. Borgarstjórin vil hava løgmann at taka stig til at fáa neyðugu lógarheimildina úr Løgtinginum um loyvi til at seta upp vakmyndatól.
Ruth Vang, býráðslimur og løgtingslimur, er hinvegin hart ímóti, at kommunan fær loyvi til at seta upp vakmyndatól í býarrúminum. Hon heldur, at rætturin til eitt privatlív eigur at viga tyngri, enn tað at geva politinum loyvi til yvirvaking av borgarum í býarlívinum. Hetta líkist viðurskiftum í totaliterum statum, har myndugleikarnir brúka hetta sum høvi til at halda eyga við teirra borgarum, sigur hon.
Vit høvdu teir báðar Bjarna Kárason Petersen, floksfelaga hjá Ruth Vang, sum er stødd uttanlands, og Heðin Mortensen, borgarstjóra, í útvarpsstovuna at venda spurninginum um vakmyndatól.