Í vikuni fekk Bretland nýggja forsætisráðharra. Men tað er eitt samfelag í stórum trupulleikum, ið nýggi, konservativi leiðarin, Liz Truss, nú skal standa á odda fyri. Regin Berg, útbúgvin stjórnmálafrøðingur frá lærda háskúlanum í Aberdeen, og Bjarni í Liða, útbúgvin búskaparfrøðingur frá London School of Economics, greina støðuna í útvarpsstovuni. Eisini fáa vit eina støðulýsing frá Katrin Johannesen, journalisti, sum býr í býnum Brighton við ensku suðurstrondina.

Í vikuni kom Føroya Arbeiðsgevarafelag við nýggjum bóklingi, har orkusjónarmiðini hjá vinnuni koma til sjóndar. Samstundis sum vinnan vil hava grøna orku - so má fokus vera á orkuprísin, heldur vinnan. Við bóklinginum í hondini settu vit Niels Vinther, stjóra í Vinnuhúsinum og Hákun Djurhuus, stjóra í SEV, stevnu til eitt kjak um javnvág millum veitingartrygd, umhvørvi og kostnað.

Redaktión: Hallur av Rana, Kári Mikkelsen og Jón Brian Hvidtfeldt, sum eisini er redaktørur.