Føroyskir fiskimenn fáa ov vánaligan svøvn - og tað gongur út yvir teirra heilsu, og økir um vandan fyri arbeiðsóhappum umborð. Tað er niðurstøðan í Ph.D ritgerð hjá Annbjørg Abrahamsen um yvirmøði hjá fiskifólki. Hennara gransking staðfestir, at hvíldin er alt ov lítil innan fleiri skipabólkar, og tað gongur bæði út yvir heilsu og trygdina umborð. Annbjørg Abrahamsen hevur kannað arbeiðsumstøðurnar umborð á ísfiskalínuskipi, frystilínuskipi, garnaskipi og trolbátum størri enn 40 tons. 157 fiskimenn eru við í kanningini, sum fevnir um 18 túrar við 16 ymiskum skipum.

Átrokandi neyðugt er at gera nakað fyri at bøta um viðurskiftini umborð á fleiri partrolarum, sum ikki halda ásetingar um trygd á sjónum. Tað staðfestir nýggj kanning hjá Sjóvinnustýrinum, sum hevur kannað umstøðurnar á partrolarum eftir samanstoytin millum Eysturbúgvan og Vesturbúgvan í fjør. Sambært kanningin halda fleiri av skipunum als ikki ásetingar, tá tað ræður um trygd á sjónum.

Luttakarar: Hans Johannes á Brúgv, stjóri í Sjóvinnustýrinum. Jan Højgaard, formaður í Fiskimannafelagnum. Anfinnur Garðalíð, formaður í Skipara- & Navigatørfelagnum. Stefan í Skorini, stjóri í Reiðarafelagnum.

140 fólk úr Ukraina eru komin til Føroya, sum flóttafólk undan krígnum. 98 av teimum eru vaksin - og fleiri av teimum, hava fingið arbeiði í Føroyum, vísa tøl frá Útlendingastovuni. Fleiri teirra hava fingið arbeiði á Hotel Brandan og Hotel Hafnia. Men sambært Súnfríð Lambaa Ihlen, varaleiðari á báðum hotellunum, er neyðugt at fyrireika fyritøkurnar til at taka ímóti útlendskari arbeiðsmegi, sum kemur úr einum krígsøki.

Luttakarar: Súnfríð Lambaa Ihlen, varaleiðari á Hotel Brandan og Hotel Hafnia. Sólva G. Dam, deildarleiðari á Útlendingastovuni.

Lagt Breddan til rættis: Birgit Carina Eliasen, Hallur av Rana og Jón Brian Hvidtfeldt, sum eisini var redaktørur.