Fríggjadagin var síðsti skúladagur á Glasi. Tá fingu vit orðið á tveir næmingar og samskiparan á serbreytini.

- Tá fólk koma á serbreytina, hyggja vit at styrkjum og veikleikum hjá hvørjum næmingi. Síðani leggja vit eina ætlan eftir tí, sigur Katrin Olsen, ið er samskipari á serbreytini.

Undirvísingin leggur dent á samleikamenningina og trivnaðin.

Undirvíst verður í smáum bólkum, bæði í vanligum lærugreinum á hóskandi stigi, í sosialum førleikum, at duga at handfara egið lív, fólkaræði, samstarv, dannilsi, o.s.fr.

Harafturat verður undirvíst í ymiskum handverksyrkjum og kroppi og heilsu.

Seinnu helvt av fýra ára langa skúlaskeiðnum eru næmingarnir lutvíst í starvsvenjing.

Sharada Ýr Unadóttir og Elis Michelsen lata væl at skúlanum, og tey fara ikki at sita hendur í favn, nú skúlin endar.

Sharada fer at hjálpa til á Glasi. og Elis hevur fingið arbeiði hjá portørunum á Landssjúkrahúsinum.

Katrin Olsen ger vart við, at um onkur hevur hug at søkja, so eru enn nøkur tøk pláss á serbreytini næsta skúlaár.