Tey flestu munnu seta Holgar Jacobsen í samband við tónleik. Hann er kendur úr Holgar og villmonnum, Tinganest og hevur givið nógv út á egnum beinum.

Hann dugir tó annað enn at fáast við tónleik. Fyri stuttum legði hann seinastu hond á ein snotiligan, fjarstýrdan modellbát.

Pápi mín gjørdi fleiri modellskip. Eg plagdi at fylgja væl við tá, men so bleiv eg vaksin, sigur Holgar Jacobsen, brosandi.

Báturin, sum hann hevur bygt, er ein 50 tonsari. Hesir vóru rættiliga vanligir fyrr, og mær hevur altíð dámað so væl skapið á teimum. Haldi teir eru arkitektoniskt meistaraverk, sigur Holgar Jacobsen.

Hann fór undir arbeiðið í februar, og nú er næstan komið á mál. Enn manglar tó trolið og onkur annar smálutur.

Nógvir tímar eru brúktir, men korona hjálpti væl. Tá bleiv eg sendur til hús og kundi hugsavna meg um modellbátin, sigur Holgar Jacobsen, ið ætlandi fer undir okkurt nýtt modell seinni.