Í Skúlanum við Streymin hava tey - sum tann einasti skúlin í landinum - brúsuklivar heldur enn eitt rúm við brúsum. Hugskotið kom fyri nøkrum árum síðani, tá nýggi skúlin skuldi prosjekterast.

– Vit høvdu eina avbjóðing serliga við hádeildini, tí tey møttu ikki upp til ítrótt, millum annað tí tey ikki vildu í brúsu saman við flokksfeløgunum, fortelur Sonni Djurhuus, skúlastjóri og heldur fram:

– Vit tóku so henda trupulleikan upp við ein sálarfrøðing á Sernámi. Sálarfrøðingurin skilti væl, at tey ikki tímdu í brúsu, tí tey vildu ikki vísa seg fyri hvørjum øðrum. Eg spurdi so bygginevndina og arkitektarnar, um tað ikki var møguligt at tekna pláss til klivar, soleiðis at næmigarnir kundu fara meira privat undir brúsu, sigur Sonni Djurhuus.

Hann vísir á, at hóast brúsuklivar ikki eru vanligir í umklæðingarrúmum í Føroyum, so er støðan annarleiðis uttanlands.

– Eg havi ferðast í nógvum londum við Parasport Føroyar, og í tí sambandi havi eg lagt til merkis, at brúsuklivar eru púra vanligir alla aðrastaðni enn í Danmark og Føroyum, sigur Sonni Djurhuus, sum heldur, at áhugin at møta upp til ítróttartímarnar eru batnaður, eftir at brúsuklivarnir eru settir upp.

Í morgunsendingini fortaldi Sonni Djurhuus um avgerðina at hava brúsuklivar heldur enn felags brúsurúm.