Dunnur hava als ikki gott av at eta breyð.

Neyvan hugsa vit um tað, tá vit fara út í náttúruna at geva dunnum breyð, tí hetta er jú nakað, mann hevur gjørt í nógv ár.

Men hvørki dunnurnar ella umhvørvið hava gott av breyði.

– Tað er ikki tað besta fyri dunnurnar og heldur ikki fyri vatnið, har dunnurnar halda til. Úti í náttúruni liva dunnurnar av plantum og smákyktum, sum eru í vatninum, og tá tú gevur teimum breyð, so broytir tú vistskipanina í vatninum. Lorturin hjá dunnunum blívur góð føði fyri algur í vatninum, so tær vaksa og taka so at siga yvir í vatninum. Og tá fáa planturnar niðri á botninum ikki tað ljósið, tær hava tørv á. Á tann hátt hvørvur nátúrliga føðin hjá dunnunum, sigur Annika Patursson Nørspang, djóralækni.

Umframt at tosa um dunnur og breyð, svaraði Annika Patursson Nørspang eisini spurningum frá lurtarum.