Hjálparfólkafelagið heldur, at tað eru skeivleikar í starvfólkabýtinum á dagstovnaøkinum - bæði tá talan er um hvussu nógvir námsfrøðingar skulu vera í mun til hjálparfólk, og hvussu arbeiðsuppgávurnar skulu deilast millum námsfrøðingar og hjálparfólk. Hetta er beinleiðis størsta orsøk til manglandi stabilitet á økinum, sigur Sámal Hansen, formaður í Hjálparfólkafelagnum.

Tá tað kemur til setanartreytir sigur sáttmálin soleiðis: "Treytin fyri at verða settur í starv er, at viðkomandi hevur lokið námsfrøðiligt prógv, ella samsvarandi prógv, ið er góðkent av Mentamálaráðnum og Føroya Pedagogfelag. Stk. 2. Um eingin pedagogur søkir starvið, kann hjálparfólk verða sett fyribils, til pedagogur søkir starvið. Normerað størv, sum ikki eru sett við pedagogum, skulu lýsast leys minst 6. hvønn mánað. Sambært semju millum sáttmálapartarnar kann undantak gerast, so størvini verða lýst leys við eitt ára millumbili."

Hjálparfólkafelagið er av teirri fatan, at stóri trupulleikin ikki skyldast mangul uppá námsfrøðingar, men er eitt úrstlit av manglandi skipan á økinum.

- Tað er neyðugt at normera ein part av størvunum til hjálparfólk soleiðis, at býtið av pedagogum og hjálparfólki er í samsvar við arbeiðsuppgávurnar og tey størv, ið eru á økinum. Við at normera ein part av størvunum til hjálparfólk, høvdu leiðarar sloppið undan at lýst mannað størv leys at søkja - størv við væl skikkaðum starvsfólki, sum ynskja at halda áfram í starvinum, sigur Sámal Hansen.