Tá Frank Davidsen fór undir at koyra skúlakoyring við næmingum í Sørvágs skúla, var tað tí hann ætlaði at gera skiftið frá arbeiðsmarknaðinum til pensjonistatilveruna, lagaligari.

Hann skrivaði undir ein trý ára sáttmála. Hetta eru góð 13 ár síðani. Men í summar gevst Frank Davidsen.

– Mær hevur bara dámað hetta betur og betur. Børnini eru ómetaliga góð at fáa við.

– Eg havi ikki hoyrt eitt øvut orð nakrantíð, leggur Frank dent á.

Á túrinum, sum morgunsendingin er við skúlabussinum, verður tosað um mangt og hvat.

Eitt nú verður greitt frá einum tilburði í fótbóltsdysti, sum kom at ávirka tilveruna hjá Frank í eini 30 ár.

Eisini skifta vit orð um drúgvu yrkisleiðina hjá Frank Davidsen sum tollari á flogvøllinum.