- Tíðindi, mentan og ítróttur
Góðan morgun Føroyar
Í blaðnum Fjølnir, sum MFS gevur út, er grein um tvær føroyskar kvinnur, báðar mammur og lesandi, sum hava ment eina app, ið kann hjálpa brúkarunum at finna dygdargóðar endurnýtslu-lutir.
Hugskotið varð upprunaliga skapt heima hjá Mariu Fagranes Clemmensen. Hon hevði lagt til merkis, at tað var trupult at finna endurnýtsluhandlar á netinum, sum seldu dygdarvørur.
At keypa second-hand var tí langt frá líka dragandi sum at keypa frá vanligum, altjóða nethandlum.
Seinni hevði Maria eina framløgu fyri barndómsvinkonu síni, Elini Brimnes. Stutt eftir bleiv eisini hon partur av verkætlanini.
Meðan tær hava arbeitt við Secondly, sum appin eitur, hevur Maria gjørt seg lidna við útbúgvingina á Copenhagen Business School. Samstundis hevur hon havt starv í grunninum, Seed Capital Danmark. Harafturat er hon mamma at átta ára gamlari dóttur.
Elin ger seg lidna við útbúgvingina, Strategic Design & Entrepreneurship, umframt at hon er mamma at trý ára gomlum soni.
Tað er alneyðugt at leggja dagin væl til rættis og hava disiplin, siga tær báðar.
Fyritreyt er eisini, at tú hevur eitt gott bakland, sum stuðlar tær.