- Tíðindi, mentan og ítróttur
Góðan morgun Føroyar
Nýggi føroyski spælifilmurin, 111 góðir dagar, hevur gingið í biografinum í eina tíð. Í stuttum snýr filmurin seg um tveir menn, sum blíva við at hittast undir løgnum umstøðum. Tað vísir seg spakuliga, at teir eru samantvinnaðir av onkrari hægri megi, sum teir ikki skilja. Ella sum ikki kemur fram fyrr enn móti endanum av filminum.
- Hetta er ein 'coming of age' søga úr Havn í dag, eftir øllum at døma við persónligum støði í leitandi og samansetta leikstjóranum sjálvum, og annars við almennum høvuðsdenti á ungdóm og fyrstu tilveruligu royndir at standa á egnum beinum, definera vinaløg og arbeiðsfelagsskapir og ikki minst tað kyns- og paraliga, sigur Birgir Kruse, ummælari.
Trygvi Danielsen hevur skrivað og leikstjórnað filmin, og Pætur Marjunarson Dahl er høvuðsframleiðari.
Í samrøðu við Portalin fyri jól, sigur Trygvi Danielsen: ”eg havi skrivað filmin út frá egnari kenslu av, hvussu tað følist at búgva í Havn, í Føroyum sum heild, men serliga í Havn, tí tað er har eg eri frá. Eisini havi eg skrivað filmin útfrá, hvussu tað kenst at vera í 20-unum og at koma inn í seinnu helvt av 20-unum. Hvussu einsligt tað verður, bæði tí at har eru fá fólk, sum tú kennir í tí aldursbólkinum, men eisini tí tað er einsligt at blíva vaksin, at skula taka ábyrgd og alt tað, sum hoyrir við. Tað er eitt sindur ein granskan av mínari uppliving av Havnini."