- Tíðindi, mentan og ítróttur
Góðan morgun Føroyar
Umleið 40 føroyingar lata blóð hvørja viku á teimum trimum sjúkrahúsunum, og hetta blóð verður bæði nýtt, tá vanlukkur henda, tá skurðviðgerðir krevja blóð og tá ymsar sjúkur hava við sær, at sjúklingar mugu hava nýtt blóð, greiðir Joan M. Petersen, deildarbioanalytikari í blóðbankanum, frá.
Tá tú ert blóðgevi letur tú blóð upp til fýra ferðir árliga, og tað tekur umleið ein hálvan tíma hvørja ferð, so tað hevur ikki so nógv upp á seg, heldur Marianna á Dul Friðberg, sum hevur blóðflokk 0-, ein av meira óvanligu blóðflokkunum, sum tó samstundis er ein tann virðismestu blóðflokkunum, tí øll onnur kunnu taka ímóti hesum blóði, líka mikið hvønn blóðflokk tey annars hava.
Fyri at gerast blóðgevi skalt tú fylla út eitt skjal við einari rúgvu av spurningum umframt at ein blóðroynd skal takast fyri at blóð títt kann kannast fyri at tryggja, at alt er í lagið.
- Hetta verður gjørt bæði fyri at tryggja blóðgevan og tann, sum fær blóðið seinni, leggur Joan afturat.